Indi magnubo sa 23 ka mga pamalay ang gin-tupok sang kalayo sa sunog nga nagluntad sa Purok Lampirong, Barangay 2, sa siudad sang Bacolod la una sini nga hapon.
Nagdangat sa second alarm ini.
Ang area ginakabig sang Bureau of Fire Protection nga isa ka red zone, ukon isa ka lugar nga high risk sa sunog.
Ginsiling ni Fire Superintendent Jenny Mae Masip, City Fire Marshall nga wala pa mahibaluan kon ano ang gintunaan sang kalayo.
Sa inisyal nga imbestigasyon sang Bureau of Fire Protection, nagsugod ang kalayo sa balay ni Rosalie Alburoto. Wala sang tawo sa amo nga balay sang natabo ang sunog.
Ang mga nagkalasunog nga balay lunsay made of light materials, rason nga madasig nga naglapta ang kalayo.
Dugang ni Masip, may kabudlayan man ang BFP sa pagsulod sa amo nga area bangud tam-an ini kaikit.
Gin-deklarar nga fire out ang sunog 1:29 sang hapon. Wala man sang may nasamaran sa amo nga insidente.
Sa karon, padayon pa ginahibalo sang BFP ang rason sang sunog kag kon pila ka pamilya ang apektado.
Sang Biyernes lamang may isa man ka sunog nga nagluntad sa Brgy 39 sa Bacolod kun sa diin 112 ka mga balay ang nagkalatupok.
“Made of light materials gid di ang mga pamalay tapos ikit-ikit ang aton, kag wala na gani footwalk ang mga nasunugan na area kag tam-an ka ikit gid ang alagyan ta”, suno kay Masip.*
[sibwp_form id=1]