Isa ka pasyente ang nagreklamo sa National Bureau Of Investigation-Bacolod sang nagsalakit ang iya mga unto matapos magpatakod sang dental braces sa nagpakilala nga dentista sa Facebook.
Sa entrapment operation sang nbi-bacolod nadakpan sa akto ang 41 anyos nga si Karen Onas De Villaluna nga nagatakod sang dental braces sa nagpakuno kuno nga customer sa Barangay 4 sa bacolod kahapon.
Suno kay NBI-Bacolod agent in charge Atty. Renoir Baldovino, wala sang professional license kag indi man miembro sang dental association ang nagpakuno kuno nga dentista.
Ginpasakaan na siya sang kaso angut sa pagsupak sang Republic Act 9484 ukon ang Philippine Dental Act.
Narecover kay De Villaluna ang mga dental paraphernalia.
Suno sa NBI otso mil pesos ang sukot sang suspek para sa mga customer niya nga ma transaksyon online.
Barato ini kun ikumparar sa tag sinkwenta mil tubtob stenta mil pesos nga ginasukot sa mga dental clinic.
Ginalauman sang NBI nga madamo pa ang magatuhaw agud magpasaka man sang separado nga kaso batuk sa suspek.