Nag-negatibo sa methamphetamine hydrochloride ukon shabu ang crystalized substance nga nakuha sang guard sa bag sang Grade 9 student sa isa ka eskwelahan sa Barangay Banago sa Bacolod City, sang Lunes.
Ini ang ginkumpirmar ni city director Police Col. Eugene Rebadomia base sa nabaton nila nga result gikan sa Regional Forensic Unit.
Paathag ni Rebadomia nga indi pulis ang nakadakop kag sila ang nagresponde lang sa report nga may nakuha nga suspected shabu ang security guard halin sa bag sang Grade 9 student.
Base sa imbestigasyon, may isa ka estudyante nga nagtudlo sa Grade 9 student nga may dala nga armas, rason nga gin-check sang guard ang iya nga bag kag nakit-an ang duha ka putos sang puti nga substance.
Suno kay Rebadomia, gin-tripingan kag makabig nga biktima ang Grade 9 student kag siya ang ipaidalom sa psychological intervention kag debriefing.
Sa pagpang-usisa sang DepEd, gin-alegar sang nagsasko nga nagbalos lang siya sa biktima. Nakilala na ang nagsasko, nga amo mismo ang nagsugid sa security guard.
Samtang, ginsiling ni Secretary to the Mayor Atty. Jose Marty Go nga ang duha ka mga kabataan – ang nagsasko kag ang ginsaskohan ang temporaryo nga wala ginpakadto sa eskwelahan. Sila ang ginpaidalom anay sa modular learning.
[sibwp_form id=1]