Ginpahayag ni Councilor Homer Bais, chairman sang Committee on Environment, nga indi automatic nga mangin winning bidder ang kompaniya bisan pa ini ang may pinakanubo nga calculated bid sa mga kontrata sang gobyerno.
Ini ang reaksyon ni Bais matapos gin-deklarar ang IPM Construction and Development Corporation bilang lowest calculated bidder para sa garbage hauling project sang Bacolod.
Ginpaathag sang konsehal nga subong kabahin sang government bidding process, kinahanglan pa nga ma-evaluate sang Bids and Awards Committee (BAC) ang mga dokumento, technical capability, kag nagligad nga performance sang bidder.
Suno kay Bais, posible gihapon nga ma-disqualify ang kompaniya kon indi ini makasunod ukon makalambot sang ginapatuman nga mga criteria.
Gin dugang pa niya nga sa idalum sang bag-o nga terms of reference ukon TOR, total clean-up na ang scope sang kontrata kag indi na magadepende sa kadamuon sang basura ang bayad sang LGU.
Nasaad man sa bag-o nga TOR ang pagdugang sang mas madamo nga truck para sa paghakot sang basura.*