Impartial investigation ginmando sang alkalde angut sa nagluntad nga kinagamo sa tunga sang mga residente kag katapo sang enforcement team sa Barangay 2 sa Bacolod City
Luyag ni Mayor Albee Benitez nga mapat-ud ang ugat sang kinagamo sa tunga sang pila ka mga residente sang Purok Lampirong kag katapo sang enforcement team nga nagpamuno sa demolisyon sang mga balay sa kilid sang Mambuloc Creek sa Barangay 2 sang Biyernes.
Gani iya man ginmando ang isa ka impartial investigation angut sa reklamo sang mga residente nga nag alegar ginsakit sang katapo sang enforcement team sang City Legal Office.
Nakita man sang alkalde ang video kun diin ginasulong sang pamuno sang enforcement team nga si Rey Demisana ang mag live-in partner gamit ang isa ka bara.
Ang City Legal Office ang nagpasaka na sang kaso nga light threats kag resistance and disobedience upon an agent in-authority batuk kay Junjun Meniao nga gin alegar nangbato agud mabalabagan ang pag guba sang bomba nga sakop sang ginapatuman nga demolisyon.
Ginpanginwala naman ni Meniao ang alegasyon batuk sa iya. Siya man ang natalana magapasaka sang counter charges kontra sa katapo sang enforcement team nga nagpanakit sa iya kag sa iya live-in partner.