Dead on arrival sa ospital ang iloy nga si Riza Macatigos kag iya 16 anyos kag 11 anyos nga hinablos matapos sila nga malumos kahapon sang aga sa Bago River malapit sa quarry site sa Barangay Napoles, siyudad sang Bago.
Suno sa imbestigador nga si Master Sargeant Mars Anthony Luto, nagadugsing samtang naga paligo sa suba ang duha ka menor de edad pati na ang 13 anyos nga anak ni Macatigos.
Suno sa pulis, gin tiklod sang 16 anyos ang anak ni Macatigos sa kantilado nga bahin sang suba gani nahulog sila nga tatlo.
Dugang na ni Luto, ang iloy nga indi man makahibalo maglangoy ang nag tinghua man nga buligan ang iya anak kag duha ka hinablos gani pati siya ang nalumos man.
Ang 13 anyos nga anak ni Macatigos amo lang ang nakaluwas suno sa pulis bangud nakahibalo siya mag langoy.
Nagpangayo pa ini sang bulig apang 5 tubtob 10 minutos na ang nakaligad sang mag abot ang bulig suno sa pulis amo nga wala na matabangan pa sa ospital ang tatlo ka biktima.
Gin kumpirma man ni Bago City Mayor Nicholas Yulo nga temporaryo gin pa untat sang barangay ang quarry operation sa amo nga suba matapos ang insidente.