Shadow

Iloy isa na ka bulan ang pagpangita sa 4 ka missing nga mga himata sa Sipalay

Natipon na ang kakapoy, kasakit sang bu-ot kag kalisod sa dughan ni Pinky Gilwano samtang gina istorya ang ila inagyan sang paghalit sang bagyo nga Odette sang December 17, 2021 sa Sitio Kalatong, Barangay Cabadiangan sa Sipalay City.

Siyam sila tanan ang naga istar sa ila nga balay sa tupad sang sini nga puno sang paho. Pero wala na ang ila nga balay, gin anod sang baha. Pati sila nagkala anod man sang baha. Apat sila ang naka luwas, isa ang nasapwan patay.

Ang masakit kay isa na ka bulan ang nag ligad wala sa gihapon makita ang lawas sang iya live in partner nga si Abner Quilantang, duha ka mga kabataan nga sanday Gealin kag Aldrin James, one kag apat ka tuig kag ang duha niya ka tuig nga apo nga si Louie James.

Preska pa sa pamenaron ni Pinky ang mga hitabo sang kaagahon sang pag igo sang bagyo. Masakit para sa iya bilang isa ka iloy nga wala may mahimo samtang naga pangayo ang tabang ang iya apat ka tuig nga anak.

Siya mismo, nadulaan naman sang animo bangud sang natulon nga tubig baha….

Sa sulod sang isa ka bulan adlaw adlaw siya naga pang lakaton bisan may pilas ang iya nga tiil, kag naga pang habukay sang mga na anod nga puno para lang makita ang lawas sang iya nga pamilya.

Wala sila maka pangaman kay wala sila nakahibalo nga may bagyo. Wala sila sang radyo, wala man sang kuryente. Wala man sila naka pa charge sang cellphone kay wala sang kwarta inugbayad pa charge.

Masami may naga text sa ila kag naga pahibalo kun may naga pakadto ng bagyo.

Ang tanan nga residente sa ila lugar, biktima sang bagyo. Tanan tanan natabunan sang tubig baha nga nag awas gikan sa suba.
Ang iban maswerte nga naka saka sa atop sang balay ni Narciso Barabat. 51 sila tanan ang nag tinir sa ibabaw sang iya atop halin las onse sang gab-i tubtob las otso sang aga

Ang ngalan nga Odette nga nasulat sa sini nga dingding ang marker kun diin kutob ang tuba baha sa iya nga balay.

Sang Sabado may naga inabot nga bulig gikan sa mga madre. Ilimnon nga tubig kag pagkaon ang ila dala. Mabudlay ang pagdala sang bulig kay pila pa ka kilometro ang laktanay antes malab-ot ang mga pamalay.

May suba nga tabukon antes makalab-ot sa sitio kalatong. Sa suba may naga panimaho nga patay nga sapat.

Laya ang mga pananum, ang mga nagkala utod nga puno nga gin anod sang baha naga serbe nga latayan sang mga pumuluyo.

Lalaki man ukon babaye, naga bulig hakwat sang tubig nga ilimnon.

Ang baha halin sa Cabadiangan diri nag bulyada sa Barangay Gil Montlla.

Kalabanan sa desi siyete ka mga nalumos sa baha diri nagkala kit-an.

Ang mga balay wasak sa gihapon.

May mga naga inabot na nga ayuda gikan sa pribado nga mga grupo kag gobyerno pero indi tanan may nabaton.

Si Rose Marie Occena nag pa utwas. Iya ginpakita ang litrato sang iya balay. Wala gid siya kuno may nabaton nga bulig pinansyal ukon sin man lang para sa liwat nga pagpatukod sang ila nga balay.
Pero ang iya nga mga kaingud may mga nabatunan na.

Pero suno sa LGU may masunod pa nga batch nga inugpanagtag. Gina tinghuaan nga matagaan ang tanan.

Ang proper pa lang sang sipalay ang may kuryente. Ang iban nga barangay wala ma malab-ot sang supply sang kuryente pero may makita nga mga linemen nga wala untat sa pag ubra bisan weekend.

Amat amat na nga naga ka buhi liwat ang turismo sa siudad . Sa public beach front makita nga amat amat nga may mga turista. Ang iban sa mga naga dayon sa mga resort mg naga panagtag man sang bulig.

Amat-amat ang pag bangon.

Pero si Pinky, pursigido, nag laum siya nga iya sa gihapon makit bisan tul-an na lang sang iya nga mga himata

Secured By miniOrangeSecured By miniOrange