Siudad sang Iloilo ang may yara na sang kumpirmado nga kaso sang mpox. Gina abisuhan ang publiko nga mag sunod sa mga precautionary measure.
Sa press conference sa Iloilo, ginsiling ni Dr. Mary Ann Diaz, ang pamuno sang Iloilo CHO nga may laboratory confirmed nga kaso sang mpox sa Iloilo City.
Wala sila sang may nakita nga widespread community transmission. Dugang pa ni Diaz, padayon ang pag patuman sang health authorities sang maid-id nga monitoring.
Upod sa mga allied health institution nagapatuman man sila sang case finding kag contact tracing.
Magluwas sa kumpirmado nga kaso may yara man sang apat ka mga suspected cases sa siudad.
Suno kay Diaz ini sila ang na isolate kag gina hatagan na sang nagakaigo nga medical care.
Yara naman sila sa estable nga kondisyon.
Nalakip sa mga precautionary measures ang pag observe sang proper hand hygiene.
Ang mpox naga lapta paagi sa skin to skin contact, kasubong man mucosal lesions kaangay sang paghalok, pag pakighilawas kag respiratory secretions.
Pwede man ini maglapta paagi sa na contaminate nga bayo ukon beddings.
Gina abisuhan ang publiko nga ipaiway ang mga crowded ukon mga naga ginutok nga lugar.
Gina panugyanan man ni Diaz ang mga travellers nga antes pa man mag biyahe mas maayo kun pat-uron na nga daan ang mga lugar nga kaladtuan.
Pila sa mga sintoma sang mpox ang skin rash ukon mucosal lesion, paghilanat, sore throat, pag pangadlay, sakit ulo kag pag palanakit sa kalawasan.
Sa Negros Occidental kag Bacolod City suno kay Adrian Hort Ramos ang pamuno sang Provincial kag City DOH Office wala sang recorded mpox cases.