Agud makakuha sang dugang nga ebidensya batuk sa isa pa gid ka upod sang gunman sa pagpaniro sang negosyante sa Ilog, nag-apply sa Korte ang Ilog PNP sang cybercrime warrant.
Nag-gwa sa imbestigasyon sang kapulisan nga ang gunman nga si Vannie Galagate, alyas “Dodoy”, ang indi naga-isahanon, sa pagpatay sa negosyante nga si Philip George Vail Sr.
Si Vail ang chairman of the board sang Dancalan Private Academy. Siya ang gintiro sa Dancalan Public Plaza, sadtong Agosto 5.
Ginsiling ni Police Major Randy Babor, hepe sang Ilog PNP, kun mag-abot ang warrant, ila na nga igabuksan kag iga-explore ang cellphone nga narekober kay “Dodoy”.
Si “Dodoy” nga residente sang Barangay Pinggot sa Ilog, ang natiruhan sang mga nagresponde nga kapulisan sang hana ini nga magpalagyo sa crime scene.
Nakilala na sang kapulisan ang upod ni “Dodoy” apang kinahanglan pa nila sang dugang nga ebidensya agud mapasaka ang kaso nga murder batuk sa iya.
Suno kay Babor, kun wala sang cybercrime warrant halin sa Korte, indi nila basta-basta nga mabuksan ang cellphone kag indi man ini magamit bilang ebidensya.
Makabig na nga “solved” ang kaso apang indi pa “ case closed” bangud sa dugang nga development, suno pa kay Babor.