17 anyos nga bata nga lalaki ikatatlo nga napatay bangud sang probable leptospirosis sa Bacolod.
Isa ka menor de edad nga lalaki ang nagtaliwan sang nagligad nga bulan sang Mayo tuga sang suspected leptospirosis sa Barangay Bata sa Bacolod.
Ginpahayag ni Dr. Grace Tan, pamuno sang Environment Sanitation Division sang City Health Office nagpaligo ang bata sa suba antes naghilanat kag nagsakit ang tiyan.
Pagkasunod na nga semana sang ini ang nagtaliwan. Ginapahanumdom sang City Health Office ang pagpasiguro sang malimpyo nga palibot agud wala sang sarang maistaran ang mga peste kasubong sang ilaga.
Ginakinahanglan man suno kay Tan ang insigida nga pag pakonsulta agud mapaiway ang pagkautas sang kabuhi.
Sa record sang CHO, may anum na ka kaso sang probable leptospirosis sa siudad humalin sang Enero.