Gin-abisohan na sang Bacolod City Legal Office kag Business Permits and Licensing Office ang AMA Computer College nga boluntaryo anay nga untaton ang operasyon samtang wala pa ini maka renew sang permit.
Natapos na kahapon ang tatlo ka adlaw nga ginhatag sang siudad sa eskwelahan agud magpakita sa BPLO, apang wala ini sa gihapon magkadto ukon magproseso sang ila permit.
Bangud sini, kaina sang aga, ginpanaog na sang siudad ang second notice to comply sa AMA Computer College-Bacolod Campus.
Ginsiling ni Atty. Marty Go, Secretary to the Mayor, 15 ka adlaw ang ginhatag sa eskwelahan para mag-comply sang ila kakulangan sa business permit.
Sa sulod sang 15 ka adlaw, kUn indi pa makakuha sang permit ang AMA Computer College, ipasara na ini sang siudad.
Ginapangabay sang siudad ang eskwelahan nga mag-comply sa tanan nga requirements sang siudad agud maka renew sang business permits para indi na maapektohan pa ang mga estudyante.
Nangin kontrobersyal ang amo nga eskwelahan matapos nga masobra sa 150 ka mga estudyante ang wala sini gintugutan nga magpakigbahin sa graduation rites bangud sa gina-alegar kapaslawan sa balayran kag kakulangan sa dokumento.
Ang ini nga desisyon sang eskwelahan ang kabangdanan sa pagreklamo sang mga estudyante nga gilayon man nakadangat sa igtalupangud sang siudad.
Magluwas sini, ginahandaan naman sang Department of Education Bacolod City nga maghatag sang Notice of Violation sa amo nga eskwelahan bangud sa isyu sang tinalikdan nga graduation rites.
[sibwp_form id=1]