Indi dapat pagkalipatan ang kahulugan sang EDSA People Power Revolution.
Ini ang mensahe sang pamuno sang Federation of Urban Poor sa ila nga pagtililipon kaina sang aga sa istatwa ni Ninoy Aquino sa dalan Araneta sa Bacolod kun sa diin sila ang naghalad sang bulak, nag-amba kag nagpangamuyo.
Suno kay Joy Jarabelo, dapat magapabilin ang demokrasya nga na-angkon balik sang tion sang EDSA
Panawagan man sang grupo nga dapat magpanindugan karon kontra sa charter change.
Dapat ipadayon man ang pagpakigbato sang Pilipino sa iya kinamatarong sa West Philippine Sea suno kay Jarabelo.
Importante suno sa iya ang pag hili-usa nga amo man ang mensahe sang EDSA.
Pero pag hili-usa suno sa iya para sa matarong ang itib-ong kag indi sa pagpamigos.
Samtang, Bayan Negros kag mga kaalyado nga organisasyon sini ang nagmarcha sa mayor nga dalananon sang Bacolod sini nga hapon angut sa pagsaulog sang EDSA.
Ila ginapahanumdom nga kun ano man ang natabo nga pagpahalin sa mga nagapamigos sang tion sang EDSA ang sarang man matabo sa karon. Ila man ginapamatukan ang Anti-Terror Law.