Nagpakig-angut na ang pamunuan sang National Council for Disability Affairs sa Bacolod LGU para sa natalana nila nga pagbisita sa siudad.
Ini agud matun-an kag mapatuman ang nasuguran nga initiative sang siudad para matapna ang paglapta sang peke nga mga PWD IDs.
Ginsiling ni Bacolod-DSSD OIC Alma Gustilo pila pa ka mga LGU ang nagpabutyag sang interes para sa natalana nga pagpatigayon sang benchmarking sa ginapatuman nga QR code system nga ginkabig best practices sang Bacolod.
Sa senate hearing sang Committee on Ways and Means angut sa tax leakages nga natuga sang nagapamentaha sa PWD IDs, ginpahayag ni Mayor Albee Benitez nga nangin simple lang ang Sistema pero dako nga bulig kag benepisyo ini para sa mga commercial establishment nga sadto nagareklamo sa mga peke nga IDs para maka-angkon sang discount.
Gin-recommend man ni Senator Sherwin Gatchalian nga nagaserbe chairperson sang committee nga dapat ma-replicate sa iban pa nga LGU ang Sistema sang Bacolod LGU agud mauntat na ang pag-gamit sang fake nga PWD IDs sa pungsod.
Gindugang niya ang pagduso sang amendment sa layi agud ma-penalize ang mga naga-gamit kag naga-himo sang peke nga government issued ID.