Detained sa gihapon ang isa ka soldado matapos magpaniro sang tricycle driver sa dalan Rizal, sa atubang sang plaza sa Barangay 1, Himamaylan City.
Ginpasakaan sang kaso nga direct assault ang 33-anyos nga soldado matapos magbato sa pulis. Siya ang may ranggo nga private first class kag residente sang Himamaylan.
Ginsiling ni Police Lt. Peter Genovia, deputy chief sang Himamaylan PNP, ang soldado, nga yara sa impluwensiya sang makahulubog nga ilimnon, ang nagpalapit sa tricycle driver nga nagapungko malapit sa convenience store.
Ginpagwa sang soldado ang iya pusil kag sila ang nagdumugay. Nagpalupok sang pusil ang soldado kag naiguan ang 45-anyos nga tricycle driver sa natu-o niya nga tiil.
Suno kay Genovia, nakalampuwas lang gid ang kapulisan nga naga-roving sang nagluntad ang insidente. Sa ila pagbalik sa lugar agud mag-responde, sila ang gintiro sang suspek.
Nagbalos ang pulis apang nakadalagan kag nanago sa Barangay 1, kun diin siya ang na-corner.
Narekober sa soldado ang iya service firearm, magazine kag empty shells. May nakuha man nga deformed bullet sang caliber 45 nga armas sa lugar sang insidente.
Ginahulat lang sang kapulisan ang biktima nga nagapa-ayo pa, agud mapasaka ang kaso nga frustrated homicide batuk sa nasambit nga soldado.
[sibwp_form id=1]