Kaso nga homicide ang posible ipasaka batok sa suspek nga naglabo sa 46-anyos nga lalaki sa Purok Buri, Barangay Kumaliskis sa banwa sang Don Salvador Benedicto, Lunes sang gab-i.
Gikan sa ilimnan ang 54 nga suspek kag ang biktima.
Suno sa imbestigasyon sang pulis, sang mabastante sa inom ang duha, nagdesisyon sila nga magpauli.
Ginsiling ni Major Ryan Villasario, hepe sang DSB Police Station, nagapanglakaton ang duha sang gingabot sang biktima ang tanum nga mais, nga ila nalabyan, rason nga gin-akigan siya sang suspek bangud abyan niya ang tag-iya sang maisan.
Nangakig ang biktima, nagpagwa sang sundang kag hana kuntani nga bun-on ang suspek. Sa baylo, nag gabot man sang binangon sa iya hawak ang suspek kag ginlabo ang biktima sa iya liog kag ulo.
Dead on arrival sa Don Salvador Benedicto Municipal Health Unit ang biktima, samtang detained naman sa DSB Police Station ang suspek.
