Mga homeowners sang apat ka mga relocation site sa Bacolod ang handa magbayad para masaylo na sa ila sang siudad ang titulo sang duta.
May masobra na sa 20 ka tuig ang nagligad pero mayorya sa 10,000 ka mga homeowners sa relocation site sa Barangay Handumanan, Estefania kag Vista Alegre ang may kabudlayan sa gihapon sa pagpatakod sang linya sang kuryente kag tubig. Ini bangud 90 porsyiento man sa ila ang indi original nga awardee sang duta kag wala sang titulo sang duta nga ila gina-istaran. Ini man ang rason nga sa ginpatigayon nga consultative hearing sang konseho, nagpalab-ot sang interes ang mga homeowners nga magbayad sang tig-P20 kada adlaw agud lang matigayon ang proseso kag ma-transfer sa ila ang lot title.
Suno kay Councilor Vladimir Gonzalez, ginatun-an man nila ang pag-subsidize sang balayran agud mabuligan ang mga homeowners. May pila naman ka mga homeowners ang naga-ayo nga kuntani processing fee na lang sang pagsaylo sang titulo ang ila bayaran natungod man sang ginapangatubang nga problema pinansyal