Pilason ang isa ka motorcycle rider sa gin-alegar hit-and-run incident sa Talubangi-Ilog Y Intersection nga sakup sang Barangay Talubangi, Kabankalan City, Martes sang aga.
Makita sa kopya sang closed-circuit television camera nga nagasakay ang biktima sa iya motorsiklo sang ini ang ginbungguan sang tricycle nga nag gikan sa proper sang Kabankalan, rason nga nagtabog ang motorcycle rider.
Naghinay pahigad sa dalan ang driver sang tricycle kag nagpundo, apang pila ka segundos ang nagligad, ini ang nagdiretso.
Makita man sa CCTV footage nga nagpadulong sa dalan nga pakadto sa banwa sang Ilog ang nasambit nga tricycle driver.
Gindala ang rider sa Lorenzo D. Zayco District Hospital. Ginapa-verify pa as of press time sang Kabankalan Police ang identity sang driver sang tricycle.