Dugang nga LGU sa probinsya ang nagdeklara sang state of calamity bangud sang epekto sang habagat. Sini nga adlaw ginpaidalom man ang banwa sang Hinigaran kag siudad sang La Carlota sa state of calamity.
Suno kay Hinigaran Mayor Nadie Arceo, sa session sang Sangguniang Bayan kaina, gin aprobahan ang resolution nga naga paidalom sa banwa sa state of calamity.
Pila sa mga lugar nga may pagbaha suno kay Arceo amo ang Barangay Aranda, Camalobalo, Palayog, Calapi, Candumarao, Gargato, Tagda kag pila ka bahin sang Bato.
Suno sa iya madamo sa mga pumuluyo kaangay sang mga mangingisda kag mga tricyle driver nga apektado ang palangabuhian.
Masobra sa 20,000 ka mga persona ang apektado sang habagat sa banwa kag may mga 70 ka persona ang naga pabilin sa mga evacuation center as of press time.
Sa La Carlota City naman suno kay Mayor Rex Jalando-on, madamo ang ila nga evacuees.
Una bangud sang mga ginbaha, ika duha amo nga may gin-evacuate pa gid sila gikan sa mga landslide prone areas, nga naga lakip na sa yadtong mga naga puyo malapit sa mga suba.
Ginpakamaayo suno sa alkalde nga mag paidalom sa state of calamity agudto magamit ang disaster fund labi na nga nga may pre-emptive evacuation man igapatuman ang siudad sa apat ka mga sitio sa Brgy Yubo nga sakop sang 6km danger zone sang Kanlaon.
Ang malain nga panahon ang nag apektdo sang ila ipatuman nga pre-emptive evacuation.
Damlag pa ang San Enrique nag deklara naman sang state of calamity.
Samtang ginsiling naman ni Governor Eugenio Jose Lacson nga gina tun-an karon sang probinsya ang pag paidalom sa bilog nga Negros Occidental sa state of Calamity.
Sa 12 nn nga report sang Provincial Disaster Risk Reduction Management Office nagdangat sa 149,962 ang pumuluiyo nga apektado sang habagat sa 25 ka mga banwa kag siudad.