85 percent na nga nahuman ang tent city sa Himamaylan.
Ini suno kay Office of the Civil Defense Negros Island Region Director, Donato Sermeno, III, nag nag siling man nga 300 lamang ka mga tolda ang natukod bangud ini lamang ang tigayon nga ma accommodate sang lugar kay ginsunod nila ang 2 meters nga distansya sa kada tent.
Damlag pa ginsiling sang OCD nga 500 ang target nila nga iga-install nga tent sa Himamaylan. May water tanks na, may napahamtang nga toilets kag may kuryente na.
Pero maga dugang pa sang banyo, kag maga butang sang solar-powered lights.
Maga padala man sang 300 ka mga tent ang OCD sa Canlaon City kag ang LGU na ang maga install sini. 200 naman ka mga tents ang ipadala sa San Carlos City.
“Sa subong nga semana, sa sini nga weekend ma deliver kami didto sa Canlaon City sang tents. 300 man. And then sa San Carlos mga 200 siguro ka tents i-deliver namon didto”, suno kay Sermeno.
Padayon pa ang pag pangita sang dugang nga evacuation center sang OCD para sa Alert Level 4.
Naga inventory man sila para mapat-od kun pila pa gid ang kulang sa gina paabot mga 100,000 nga iga evacuate nga persona sa idalom sang Alert Level 4.
“Daku pa ang gap. Ongoing ang inventory. Amo na gani gina pa ano kami sang Central Office, gina pa paspasan para makita gid naton exactly kun pila gid ang kulang”, suno kay Sermeno.
Ang mga eskwelahan ukon classrooms suno kay Sermeno ang pinaka ulihi na nila nga option para teneran sang mga iga evacuate.