Sang nagligad lang bulan ginligwat sang konseho sang Bacolod ang ordinansa tuhoy sa pagpatuman sang highlights sang MassKara Festival celebration halin sa 4th Sunday kada bulan sang Oktubre pakadto sa 3rd Sunday sang amo nga bulan.
Ang amendment ang naduso bangud sang masami maulanon nga panahon nga naga-apekto sa tuigan nga selebrasyon.
Pero base sa Republic Act 11146 nga gin-author ni anay Congressman kag karon Mayor Greg Gasataya, nakasaad nga dapat kada 4th Sunday sang Oktubre ang mangin highlight sang selebrasyon.
Ginklaro sang alkalde nga nagakadapat nga mangibabaw ang layi gani magapabilin nga sa ikaapat nga Domingo ang pagpatigayon sang streetdancing competition nga amo ang highlights sang MassKara Festival celebration.
Ang RA 11146 amo man ang nagakilala sang Bacolod City Charter Day nga ginasaulog kada Hunyo 18 kag pagdumdom sang inauguration sang siudad kada Oktubre 19.