Tuesday, November 17

High data project mangin dako nga bulig sa pagpadasig sa operation sang City Assessor’s Office

Ginakabig ni Bacolod City Assessor Atty. Maphilindo Polvora nga dako nga bulig sa ila nga operasyon ang Geographic Information System kag Property Assessment and Tax Administration System nga proyekto sang siudad sa idalum sang High Data Infrastracture Corporation agud mapasadig ang kag mangin effecient ang pagkolekta sang Real Property Tax sa Bacolod.

Ini kasunod sang pag-anunsyo ni Congressman Alfredo Abelardo Benitez nga halos katunga sang mga properties sa Bacolod ang wala pa ma register sa City Assessor's Office, butang nga ginpamatud-an man ni Polvora.

Suno kay Polvora, kun sang una makapila pa ka beses nga magpila ang isa ka persona agud magbayad sang iya real property tax, apang paagi sa GIS, makita na gilayon sang ila talatapan kun ano ang status sang amo nga property kag indi na kinahanglan pa magpila sang malawig.

Sa system naman mismo nakabutang kun pila ang tax nga kinahanglan bayaran sang owner, gani suno kay Polvora, malikawan gid ang posible nga pagpang-kurakot.

Dugang pa, makita man sa amo nga system, kun ano nga mga building ang wala pa makabayad sang real property tax bangud ginamarkahan ini sang satellite. Paagi man sini, ginapaabot nga mas mangin mataas pa gid ang tax collection sang siudad.

Anum pa lang kabulan nga ginagamit sang City Assessor's Office ang amo nga system. Sa 2.1 billion pesos nga proyekto sang siudad sa idalum sang High Data Infrastructure, 125 million pesos diri ang natalana sa duha ka nasambit nga mga systems.

Sarang ini mabayadan sang siudad sa 10 ka tuig, apang suno kay Polvora, sa sulod sang duha ka tuig, sarang na nila ini mabayadan bangud sa gInapaabot nga pagsaka sag tax collection.

[sibwp_form id=1]
Secured By miniOrangeSecured By miniOrange