Gintiro ang helper sang isa ka store para sa motorsiklo sa Purok Lampirong, Brgy. 2, Bacolod City kahapon sang hapon.
Ginkilala ang biktima kay Aljohn Peñaroyo, 28-anyos. Suno sa station commander sang Police Station 2, P/Captain Glenn Montaño, ginpalapitan lamang ang biktima sang suspek kag hinali nga gintiro.
Igo sang bala sa dughan kag ulo ang naangkon sang biktima. Suno pa sa pulis, drug user ang biktima. Gina-imbestigaran pa karon ang motibo sa krimen kon ini ang may kaangtanan sa iligal nga druga ukon bangud sa pagngimon.
Suno kay Montaño, may tawo nga nagapangimon sa biktima kag isa man ini sa ila ginalantaw kon may kaangtanan sa pagtiro sa iya.