Husto lang nga ginpang plete ni Honeyleen Casumpang ang nabaton nga 227 pesos nga Special Risk Allowance halin sa pondo sang Bayanihan to Heal as One Act sang nagligad nga tuig.
Gani magluwas nga naakig iya man ginpahayag nga sa sulod sang 15 anyos niya na nga pag trabaho bilang head nurse sa ospital, halos wala na siya nagakalipay bangud sang risgo kag diskriminasyon sa pagpanagtag gobyerno sang benepisyo para sa mga kasubong nila nga medical frontliners.
Suno kay Noel Alisen, presidente sang Riverside Hospital Workers Union kag convenor sang Medical Frontliners Association, nahangpan nila ang sitwasyon sang mga ospital sa karon nga ginakulang na ang mga medical personnel pero luyag lamang ipanawagan ang patas nga pagpalab-ot sang benepisyo, kasubong sang sra, trasportation, medical kag accomodation allowances karon nga may pandemic.
Sa Setyembre 21, maga-upod man si Honeyleen kag ang pila pa ka mga health care workers nga nagaplano nga maghalin sa serbisyo kun indi matuman ang ila ginahinyo.
Ginklaro man sang grupo nga wala sila sang reklamu sa tagdumalahan sang ospital kundi direkta sila nga nagapalab-ot sang hibunbun-ot sa Department of Health.
Sa press conference upod man sa lideres sang labor sector, ginpasalig man ni Bacolod City Councilor Wilson Gamboa, Jr nga iya igaduso sa natalana nga session sa konseho ang pagpangita sang paagi agud mabuligan ang mga medical personnel sa mga pampubliko kag pribado nga ospital sa Bacolod.