Gunrunner arestado sang CIDG sa Kabankalan City.
Isa ka gin-alegar gunrunner ang arestado sa ginpatigayon nga operation sang Criminal Investigation and Detection Group Bacolod City Field Unit sa Aquiles Zayco Street, Barangay 9 sa siudad sang Kabankalan, Negros Occidental.
Base sa report sang CIDG, apat ka mga pusil ang narekober kay alyas “Emar”, 35-anyos, residente sang banwa sang Ilog, Negros Occidental.
Nalakip sa nakumpiskar amo ang isa ka caliber 30 garand rifle, isa ka caliber 5.6 revolver kag duha ka caliber 38 revolvers.
Suno sa report nga nakadangat kay Major General Robert Morico II, acting director sang CIDG, nagapakigbahin ang suspek sa gunrunning activities sa probinsya sang Negros Occidental.
Kaso nga pagsupak sang Republic Act 10591 ukon Comprehensive Firearms and Ammunition Regulation Act ang ginpasaka batuk sa gindakup.