Ginpahayag ni Police Major Randy Babor, hepe sang Ilog PNP, nga posible miyembro sang gun-for-hire ang suspek nga nagpatay sa negosyante sa Dancalan Public Plaza, Barangay Dancalan sa banwa sang Ilog, Negros Occidental, sadtong Martes, Agosto 5.
Ginkilala ang suspek nga si Vannie Galagate, alyas Dodoy, 34-anyos kag residente sang Barangay Pinggot sa banwa sang Ilog.
Gintiro sang suspek ang biktima nga si Philip George Vail Sr., chairman of the board sang Dancalan Private Academy. Isa pa gid ka sibilyan ang nasamaran matapos nga nasalabat sang bala.
Napatay man ang suspek matapos magbato kag matiruhan sang nag-responde nga pulis.
Ang mga pulis ang yara malapit sa area sang ila nabatian ang paglinupok sang armas luthang, rason nga sila ang nagpadulong sa plaza kag naabtan ang suspek nga hana malagyo, sakay sang motorsiklo.
Suno sa hepe, si Galagate amo ang gunman apang ila pa gina-usia kun may mga kaupdanan ang suspek sang nagluntad ang pagpaniro.
Isa sa mga anggulo nga gina-usoy sang kapulisan amo nga may angut sa mga property sang biktima ang insidente.
Suno kay Babor, si Galagate amo man ang suspek sa pagpaniro sadtong Mayo 19 sa Barangay Pinggot, kun diin patay man ang biktima.
Na-claim na sang pamilya ang bangkay ni Galagate.
