Guimaras Strait Commission ginaduso ni Bacolod City Mayor Albee Benitez agud nga mapangapinan ang palangabuhian sang mga mananagat sa rehiyon.
Ang mga mananagat sa kilid sang baybayon sang Bacolod ang pila lang sa mga apektado sa separado nga mga pagsulundan sang mga local kag provincial government unit bahin sa pagpanagat sa Guimaras Strait.
Gani ginaduso karon ni Mayor Albee Benitez nga amo man ang pamuno sang Regional Development Council sang Western Visayas nga matukod ang Guimaras Strait Commission nga amo ang magapatuman sang alalangay nga pagsulundan bahin sa pagpangisda sa kalalawran.
Kabahin sa luyag niya mapasiguro nga
wala sang dalagko nga commercial fishing company sa guimaras strait agud mas mapangapinan ang palangabuhian sang magagmay nga mananagat.
Ginahaylo man karon sang alkalde
ang mga lideres sang probinsya sang Guimaras, Iloilo kag Negros Occidental nga maghilisugot sa amo nga tikang agud mas mapahapos ang pag-proseso sang mga permit.
Pinaagi sa ginaplano nga commission tuyo sang alkalde nga matukod ang dugang nga sustainable program para sa palangabuhian sang mga small fisherfolks sa rehiyon.