Coalition sang modernized jeepney organization desidido nga i-uli ang ila mga units kun indi mangin madinalag-on ang ginapatuman nga PUV modernization program sang gobyerno.
Wala ginlipod sang 13 ka mga katapo sang Bacolod Modernized Jeepney Transport Association nga asta karon wala pa sila lubos nga nakabawi sa ila kautangan humalin sang nagpaidalom sila sa public utility vehicle modernization program.
Ginsiling ni Corazon Ocalinas sang Choret Corporation nga pareho sang iban nga mga nagpa-consolidate kag karon naga-operate sang mga modernized jeepney ang nagpa-restructure na sang ila utang sa banko tungod indi sila halos makabayad sang bulanan nga amortization.
Kabahin sa ila nakita nga kabangdanan amo ang padayon nga pag-operate sang mga colorum nga traditional jeepney sa dalan nga malawig na nga ila ginareklamo sa mga natungdan nga ahensya.
Gintuad ni Ocalinas nga upod sa iban pa nga mga operators nga kun indi gihapon sila maka-bawi sa negosyo, mapilitan sila nga i-uli na lamang ang ila mga modernized jeepney units sa banko.
Ginapasalig sang modernized jeepney organization nga ila na masarangan ang kadamuon sang mga pasahero sang siudad.
Gani nagapanawagan sila nga indi na dapat kuntani pagpadayunon pa sang Land Transportation Franchising and Regulatory Board ang paghatag sang extension para sa application for consolidation sang mga nagapamatuk sa modernization program.
Sa baylo ginapaabot nila ang full implementation sang PUV modernization program sa pungsod, ilabi na sa siudad.