Sa isa ka press conference Lunes sang aga, Mayo 18, nagpanawagan sa gobyerno ang Presidente sang Samahan ng mga Taxi Drivers sa Bacolod (SMTDB) at ng Taxi Operations Negros Occidental Association (TONO) nga si Ronald Allan Salgado, nga ilakip ang 520 ka mga myembero sang ila asosasyon sa fuel subsidy nga ginapanghatag sang gobyerno nasyonal.
Sandig sa ila pagpang-usisa may 275 pa lang ka mga taxi drivers sa siudad ang nakabaton sang ayuda, kag wala diri malakip ang halos tanan nga yara sa ila asosasyon.
Ginakwesyon man sang taxi drivers ang gulpyada nga pagdamo sang Transport Network Vehicle Services ukon TNVS sa siudad.
Suno kay Salgado, ang Bacolod City indi parehas ang ekonomiya sa Cebu kag Manila, rason nga ila ginahaylo ang gobyerno nasyonal nga usisaon kon ngaa nagdamo ang TNVS sa siudad bangud ini ang isa sa mga kaperdihan sang mga taxi drivers.
Dugang man nga panawagan nila nga kuntani mahatagan ang taxi drivers sang special fuel discount.
Kon indi sila mapamatian sang gobyerno, nagpasalig sila nga handa sila magpatigayon sang isa ka caravan rally.
Damlag pa, ginsiling na ni Atty. Gerry Llena, pamuno sang LTFRB-NIR, nga ila na sa karun ginaproseso ang ayuda para sa mga taxi drivers sa bug-os nga rehiyon.
Ginahulat nalang sa karun sang siudad ang final nga listahan sang mga taxi drivers gikan sa LTFRB nga pagahatagan sang ayuda.*
[sibwp_form id=1]