Paghinyo sa Senado nga maaprobahan ang prangkisa sang NEPC ginduso sa Power Consumers conference. Indi na maagwanta sang mga electric consumer ang sunod-sunod nga pag brownout dungan sa kaapang sang panahon.
Gani sa ginhiwat nga power consumer conference nga ginalakipan sang consumer watch group, mga tiglawas sang homeowners association kag private sector ila ginduso ang paghinyo sa Senado nga maaprobahan na ang prangkisa sang Negros Electric Power Corporation ukon NEPC.
Nagapati sila nga sa bulig sang NEPC mas mapaayo ang pagserbisyo sang distribution utility.
Sa plenary session ginduso ni Senator Grace Poe ang pamuno sang Senate Committee on Public Services ang paghatag approval sa franchise application sang tatlo ka mga distribution utility sa pungsod nalakip na diri ang NEPC nga natukod paagi sa Joint Venture Agreement sa tunga sang Central Negros Electric Cooperative kag Primelectric Holdings Incorporated.