Grupo nga responsable sa pagpangawat sa isa ka mall sa Silay City ang mahimo may koneksyon sa iban nga robbery group nga nabungkag na.
Kun basehan ang sistema sang grupo nga nangawat sa Gaisano Mall sa Silay City, indi malayo suno kay Negros Occidental Police Provincial Office Spokesperson, Police Captain Judesses Catalogo, ang posibilidad sang inside job kag may mga kaupdanan sila nga may mga koneksyon ukon katapo sa mga nabungkag nga robbery organized crime-group.
Indi pa man mapat-od sang kapulisan ang mga identity sang ginakabig isa ka gang nga nagkuha sang kapin 9 milion pesos nga balor sang mga alahas kag 100,000 pesos cash.
Pero may tatlo na karon ka mga persons of interest nga ila gina-usisa kun may kaangtanan sa nakapalagyo nga grupo nga nagbilin pa sang pila ka mga nagamit nga condom sa crime scene.
Nagapati si Catalogo nga mahimo gingamit nga pangpadanlog ang condoms kag ginputos sa mga equipment sang mga kawatan.
Sa pagpang-usisa sang PNP ang mga kawatan ang nagkasulod sa mall sang Huwebes paagi sa pag-guba sang pader sang mall.
Ginguba man nila ang roll-up door antes nagrekta sa stall sang mga alahas kag gintultol ang nakatago nga vault. Nagakatulog sadto ang mga gwardiya sang natabo ang pagpangawat suno sa mga pulis.