Nagdangat sa masobra 9 million pesos ang gross sales sa Arima night sang 36th Negros Trade Fair.
Nagalaum si Negros Occidental Governor Eugenio Jose Lacson nga kuntani mangin tayuyon ang maayo nga sales tubtob sa katapusan sang Negros Trade Fair sa Glorietta sa Makati City.
Suno kay Sybel Nobleza, ang external affairs manager sang Association of Negros Producers, kun ipaanggid sa 2019, 350 percent nga nagsaka ini.
Ila gina lauman ang 10 percent increase pero dala sang pag dugok sang tawo mahimo nga mas maga saka ini.
Suno kay Lacson mismo ang tagdumalahan sang Ayala ang nalipay sa resulta. Nagbuylog man sa Negros Trade Fair ang Negros Oriental suno kay Lacson.
Nagalaum ang gobernador nga padayon ma tib-ong ang local products nga mas gin pabaskog sa iya nga pag pa gwa sang executive order nga naga duso sang: Buy local, Go lokal. Nagbalik ang Negros Trade Fair matapos ang duha ka tuig bangud man sang pag-igo sang pandemic.