Gina imbestigahan sang Bacolod City Police Office ang isa ka insidente kun sa diin nabiktima sang isa ka scammer nga nagpakuno kuno bilang si Bacolod City Mayor Greg Gasataya ang isa ka supermart sa downtown area.
Lunes sang kaagahon, nakabaton sang tawag gikan sa nagpakilala nga alkalde sang siudad ang isa ka hotel sa downtown kag nagbook sang duha ka rooms bangud sa ginapaabot nga mga bisita.
Matapos sini, nagpangabay man ang caller nga baklan pagkaon ang mga bisita, apang wala sang pagkaon sa amo nga hotel.
Ginsugo sang caller ang security guard sang hotel nga magkadto sa pinakamalapit nga EC Pay Terminal nga nahamtang sa 24H Supermart sa dalan Rizal.
Didto na gilayon nga ginhatag sang guard sa cashier ang cellphone, kag nagpangabay ang caller nga sendan siya sang kwarta agud makabakal sang pagkaon bangud indi pa ka open ang iya nga bank account.
Nagdangat sa 9,900 pesos ang kabug-osan nga nasend sang cashier sa nagpakuno kuno nga alkalde, apang matapos nga nasend ang kwarta wala na ini magsabat pa sang gintawagan liwat.
Suno sa mga nabiktima, parehas gid sang tingog mismo ni Gasataya ang scammer, rason nga wala man sila magduda.
Natukiban man ang duha palang ka semana nga nagaobra ang cashier sa amo nga Supermart kag isa ini ma working student.
Sa karun, ginmanduan na sang alkalde ang BCPO nga i-track ang number nga nagtawag sa hotel agud mapasakaan ini sang kaso.
Ginpahanumdom ni Atty. Marty Go, Secretary to the Mayor ang tanan nga mga business establishments sa siudad nga maghalong sa mga kaangay sini nga mga modus kag I-verify sa siudad ang mga transaction nga may kaangtanan sa pangalan sang alkalde.
Handa nga magpasaka sang kaso ang siudad batuk sa scammer.
[sibwp_form id=1]