Isa ka grass fire ang nagluntad sa protected area sang Mt Kanlaon Natural Park nga napahamtang sa Biak na Bato sa La Castellana.
Sa video nga kuha kaina sang aga sang Protected Area Supertintendent sang MKNP makit-an ang pag-aso sa pila ka bahin sang apektado nga lugar kasubong man ang pagkalayo pa.
Suno kay Irene Bel Plotena ang PDRRMO Negros Occidental head, 1:41 pm kahapon nakabaton sang impormasyon ang BFP La Castellana sa amo nga sunog.
Suno kay Engr Joan Nathaniel Gerangaya ang Provincial Environment and Natural Resources Officer nga nagpadulong man sa lugar sa interview sang Digicast Negros as of 2:30 pm, wala pa lubos nga napalong ang kalayo.
Cogon suno sa iya ang nagkalasunog.
Padayon ang ground kag aerial survey sa lugar kag gina bulubanta nga mga 35 ka ektariya ang apektado.
Gina lantaw nila ang posibilidad nga basi gikan sa sigarilyo ukon gikan sa pagtutod ang gintunaan sang kalayo.
Paathag ni Gerangaya may mga naga uma sa palibot sang amo nga lugar.
“May mga tawo be nga naga uma didto. So ang possibility is basi sigarilyo , upos sang sigarilyo ukon naga tutod tutod sila bala mag ano ang ila nga gin-uma, maghawan. Ang nasunog estimate kagab-i mga 35 hectares pero ina siya indi pag gid na siya accurate gina bulubanta lang drone amon ginagamit. Ang aton nga firefighting diri lang sa kilid sa may kalayo lang. Pero ang affected area mga amo gid na siguro, based sa aton drone shots”, suno kay Gerangaya.
Nagbutang na ang BFP sang fire line agudto indi na maglapta ang kalayo.
Kaina sang aga suno kay Plotena may pag talithi kag nagalaum sila nga makabulig ini palong sang kalayo.
Nagapanawagan man sila sa publiko karon nga tuman ka init kag ka mala sang duta mag halong kag mag mangin mainandamon bangud kun madakop sang kalayo tuman kadasig ang paglapta sini.