Grand Rosary rally against corruption ang pangunahan sang simbahan Katolika sa Sabado.
Placards dapat indi personal nga hibubun-ot ang nakasulat kag dapat scriptures sa biblia.
Kadungan sa kapistahan sang Lady of the Most Holy Rosary, isa ka grand rosary rally ang hiwaton sa siudad sang Bacolod.
Magahalin sa tatlo ka mga points ang pag martsa sa dalanon.
Sa Norte, matipon sa Queen of Peace Parish, sa Redemptorist, sa Sto. Nino Shrine sa BBB Galo sa East samtang sa Sacred Heart Seminary naman sa south.
Magluwas sa Diocese of Bacolod, gin imbita naman ang mga Catholic schools kag universities sa Bacolod sa sini nga grand Rosary rally.
Ipangamuyo kag ipanawagan sa gihapon ang transparency sa gobyerno kag ang pagkambyo sang sistema.
Suno sa kay Diocese of Bacolod Bishop Patricio Buzon, sentro sang ila pangamuyo amo ang flood control scandal nga para sa iya isa ka dako dako nga inhustisya.
Pumuluyo ang biktima diri ilabi na ang mga pigado. Magapawagan ang simbahan sang accountability, pagbalik sang hustisya kag pagkambyo sang system.
Para sa obispo, madalom katama ang kultura sang korapsyon sa Pilipinas gani naga kinahanglan sang bag-o nga sistema.
Luyag nila sundan ang mga nauna nga mga aksyon protesta kontra korapsyon para indi ma alimunaw ang hibubun-ot sang tawo kontra korapsyon.
Kag bangud isa ini ka prayer rally, indi pagtugutan ang mga personal nga hibubun-ot sa placards, gusto sang simbahan nga mga scriptures kag verses sa bibliya may kaangtanan sa nagakatabo karon sa Pilipinas ang mangin unod sang placards.
12:30 sang udto ang assembly time kag maga sugod ang prosesyon ala una y media sang hapon sa sini nga Sabado, Oktubre 11.
Matipon ang tanan sa San Sebastian Cathedral kag magatakop ang rally sa isa ka misa.