Maswerte nga wala sang may nasamaran sa paglupok sang gin-alegar granada sa isa ka printing shop sa dalan JY Perez, Barangay Talubangi sa siudad sang Kabankalan, Domingo sang kaagahon.
Base sa inisyal nga imbestigasyon, gin-utod kag ginguba ang kandado sang roll-up door sang printing shop.
Nagkalabuka man ang glass sang balaligyaan kag naglinapta ang mga pagkabutang.
Nakuha sa sulod kag sa gwa sang shop ang nagalinapta nga fragments sang hand grenade. Ginapatihan nga ini ang nagtuga sang kahalitan sa nasambit nga printing service nga ginapanag-iyahan sang 31-anyos nga business woman.
Suno kay Police Lt. Col. Roberto Indiape Jr., hepe sang Kabankalan Police, wala pa sila sang may matumod nga suspek sa insidente.
Nakakuha naman sila sang kopya sang CCTV video sa lugar apang pila sa mga footages ang indi klaro.