Wala na sang bisan piso nga balayran ang tanan nga graduating students sa Bacolod City College sa ila nga graduation rites sini nga tuig bangud fully subsidized na ini sang siudad sang Bacolod.
Ginabulubanta nga 800 tubtob 900 ka mga estudyante ang makabenepisyo sa sini nga programa. Ini ang pinakauna man nga tion nga nangin libre ini.
Ginsiling ni City Administrator Atty. Mark Steven Mayo nga sabton na sang siudad ang masobra sa 2,000 pesos nga balayran sang tagsa ka graduating student.
Lakip na diri ang renta sang toga, arkila sang venue, kag bayad para sa diploma.
Ini nga programa ang nangin resulta sang nag pakigsapol ang administrasyon sang BCC kag mga tiglawas sang mga estudyante kay Mayor Greg Gasataya Hwebes nga adlaw, Abril 16.
Dugang ni Mayo tuyo sini nga mapamag -an ang sitwasyon kag mabuligan ang mga ginikanan kag mga estudyante ilabi na nga nagapadayon ang pagsaka sang presyo sang mga balaklon dala sang krisis nga ginapangatubang sang pungsod.
Gintan-aw man sang siudad ang posibilidad nga ma padayon ang amo nga programa, apang ini ang depende pa sa availability sang pondo sang siudad.*
[sibwp_form id=1]