Pag pamuno ni President-elect Ferdinand Marcos, Jr. sa Department of Agriculture ang naga pakita sang iya nga paghatag importansya sa agrikultura ukon iya nga pag prioritize sini.
Ini suno kay Negros Occidental Governor Eugenio Jose Lacson, labi na nga bilang presidente man, mangin madasig ang pagpatuman sang ano man nga iya mangin desisyon, ang Pilipinas bilang isa ka agricultural country.
Para naman kay Unifed President Manuel Lamata, maayo nga desisyon nga mismo si Marcos ang maga pamuno sang Department of Agriculture kag sarang siya maka allocate sang pondo kun diin ini mas labing kinahanglanon.
Naga salig man ang Presidente sang National Federation of Sugarcane Planters ukon NFSP nga si Enrique Rojas, sa eksperiensya ni Marcos sa patag sang agrikultura.
Nagalaum ang NFSP suno kay Rojas nga makilala man ni Marcos ang kontribusyon sang sugar industry sa pagbulig sang ekonomiya sang tion sang pandemic.
Dugang pa ni Rojas nga kuntani makit-an man ni Marcos ang pagpanghangkat nga gina atubang sang mga mangungunguma kasubong sang pagmahal sang produkto petrolyo kag abono kag maka patuman sang mga programa nga makabulig labi na sa marginal farmers.