Padayon nga maga suporta para sa gina duso nga Negros Island Region si Governor Eugenio Jose Lacson. Ini sa tunga sang nag gwa nga balita nga indi luyag si Negros Oriental Governor Roel Degamo sa pagbalik sang NIR.
Nag gwa sa balita nga sa online nga pagsinapol sa Regional Development Council sa Central Visayas sang Martes, cultural differences ang isa sa mga gina tudlo rason ni Degamo kun ngaa indi na dapat pa nga ibalik ang NIR.
Mas luyag sang mga pumuluyo sang Negros Oriental sandig sa report nga mangin kabahin sang Cebuano speaking nga mga pumuluyo sang Bohol, Cebu kag Siquijor.
Indi gusto ni Degamo nga dali-dalion ini labi na nga madamo pa sang mga isyu nga dapat maplastar kag masabat kag ini ang naga lakip kun diin ipahamtang ang mga regional nga talatapan.
May mga pros and cons ang NIR suno sa iya.
Suno kay Lacson ini ang isa ka masubo nga balita, ilabi na nga sini lamang gin aprobahan sang Senate Committee on Local Government ang lima ka hagna nga naga duso sang pagpahamtang sang NIR. Tinguhaan ni Lacson nga malambot si Degamo para mapat-od kun ano ang nag pa kambyo sang iya nga panindugan.
“That’s not good news. We’ll see. We have already senators who pushed for NIR. We will continue to support that stand”, suno kay Lacson.
Nagalaum naman si Negros Oriental Representative Jocelyn Limkaichong nga makit-an ni Degamo ang wisdom sang amo nga hagna. Ginsiling sang kongresista nga may makusog nga panawagan gikan sa iya nga constituents para sa NIR.
“Aside from bringing various government services closer to the people in our provinces, the NIR will really translate to greater employment opportunities for Negrenses” suno kay Limkaichong.
Ang tanan nga kongresista sang isla sang Negros ang nagserbe nga author kag co-author sang amo nga mga hagna.
Sang una nga gintukod ang NIR si Degamo man ang gobernador sang Negros Oriental.
“I will find out what made him change his (Degamo) mind”, suno kay Lacson.
Gintinguhaan nga malambot sang Digicast Negros si Degamo pero wala siya makasabat.
Suno kay Representative Mercedes Alvarez nga co-chair sang Technical Working group para sa NIR wala pa maka hatag sang iya nga position paper si Degamo kag makaduha ka beses na nasulatan sang komitiba ang gobernador.
Nag padala naman sang iya nga position paper sa kongreso si Bacolod Mayor Albee Benitez.
“Ang akon nga alternative, as I’ve said before was to create a sub-region. So this sub-region is what we will present sa President together with Sec. Albalos. I talked with him yesterday on the merits, and the pros and cons of the sub-region”, suno kay Benitez.
Sa idalom sang amo nga proposal iga tuga ang Region 6B kag Region 7B. Sa Region 6B, ang mga national government offices nga nabase sa Iloilo ang may satellite offices nga ibutang sa Negros Occidental kag Bacolod. Amo man ang matabo para sa Region 7B.