Mga katapo sang Association of Chief Executives ang ginapangayuan ni Governor Eugenio Jose Lacson sang ila nga position angut sa gina patuman karon nga One Hospital Command sa tunga sang mga reklamo nga gina padangat.
Suno kay Cadiz City Mayor Salvador Escalante, Jr ang presidente sang ACE ini ang ginhinyo sang gobernador sa mga alkalde sang ginpatigayon ang Christmas Party sang grupo sini lamang.
Ang One Hospital Command ang isa ka centralized system naga naga gamit sang referral system sa tuyo nga ma optimize ang healthcare delivery.
Ginsiling ni Escalante nga may maayo man nga madulot ang One Hospital Command. Pero, may yara sang mga delay nga nasugata nga nagresulta sa pagtaliwan sang pasyente.
Kinahanglan nga ma fine-tune ini.
Paathag ni Provincial Administrator Rayfrando Diaz, indi ang problema sa sistema. Nakit-an nila ang problema yara sa triage kag sa emergency room.
Makapila na ka beses suno sa iya gina sulit bisan pa sa memorandum nakabutang, nga ang mga emergency cases, dapat batunon kag indi pwede nga mabalibaran kag indi na kinahanglan pa sang referral.
Ika duha suno kay Diaz, kinahanglan man ang pag paayo sang serbisyo sang mga primary care facilities para ini sila ang sarang maka accommodate na sang mga pasyente nga indi man kinahanglan dal-on sa ospital.
Suno kay Diaz, natalana siya mag present sang data analytics kay Governor Lacson bahin sa One Hospital Command.*