Samtang naga puog ang aso, samtang naga daba-daba ang kalayo, wala malipatan sang mga bombero nga luwason pati ang mga hinuptanan nga ido sa nagakasunog nga balay sa Barangay Bata sa Bacolod sang Sabado sang gab-i.
Sa video nga kuha ni Maestro Bombero, makita ang mga katapo sang Amity Volunteer Fire Brigade EMT nga gina tinghuaan nga mabuhi ang isa ka ido nga yara sa critical nga kondisyon pinaagi sa paghatag sang CPR.
Kag nangin madinalag-on sila. Base sa post sang Community Animal Rescue Efforts ukon CARE Inc., tatlo tanan ka mga ido ang naabtan sang mga bombero kag rescuers sa sulod sang nagakasunog nga balay.
Gin risgo sang firefighters pati ang ila nga kabuhi para masalbar pati ang mga hinuptanan.
Gintagaan sang oxygen ang mga ido para maka recover.
Wala sang tawo sa balay nga nagakasunog sang matabo ang insidente.
Ginapasalamatan sang animal welfare group ang tanan nga mga bombero, medics kag emergency responders nga naga risgo sang ila kabuhi para maluwas pati ang mga pets.
Kag sa sini nga fire incident ang Amity ang ginpasalamatan sang grupo nga amo ang nag-rescue sa tatlo ka mga ido.
[sibwp_form id=1]