Matapos ang 12 ka tuig liwat nga natagaan sang power supply ang isla sang Molocaboc sa Sagay City.
Ang National Power Corporation ukon NAPOCOR ang nag-energize sang 100-kilowatt Molocaboc Diesel Power Plant sa isa ka seremonya sa Balay Kauswagan.
Humalin sang gin igo sang bagyo Yolanda ang isla sang 2013, wala na sila sang estable nga power supply.
62 anay ka mga pamalay ang una nga malab-utan sang power supply sa masobra isa ka libo ka mga pamalay sa isla.
Ang proyekto sang NAPOCOR sa isla nagalakip sang duha ka mga generator sets nga naga operate sang 8 hours kada adlaw.
Sa 2029 ginapaabot nga mangin hybrid na ang power system sa isla, diesel kag solar power.
Para kay Sagay City Mayor Leo Bebo Cueva, indi malipatan ang ini nga adlaw nga natagaan sang katumanan ang handum sang mga residente nga masugaan na.
Ang isla ang wala man sang steady nga water supply. Gani may dalagko nga mga banga sa kada balay para maka tipon sang tubig ulan.
Halin sa walo ka oras kada adlaw nga operation sang diesel power plant, ma amat-amat ini doble sa 16 oras tubtob mangin 24/7 na samtang naga damo ang mga miyembro kag mangin estable na ang sistema.
Isa ini ka temprano nga pamaskwa para sa mga residente sang isla suno sa alkalde.