Magasugod sini nga gab-i ang temporaryo nga co-working space sa Bacolod City Government Center, nga makahatag sang libre nga internet sa 100 ka online workers kag virtual assistants.
Sa media interview, ginpahayag ni City Administrator Mark Mayo nga ang co-working space maka accommodate sang tubtob isa ka gatus ka online workers, lakip na ang virtual assistants.
Suno kay Mayo, magapahamtang ang mga telco companies sang internet connection sa BCGC agud masiguro nga may maayo nga signal ang mga magatrabaho diri, labi na gid ang mga naga istar sa lugar nga wala pa sang suplay sang kuryente.
Iga plastar ang 60 ka non-voice workers sa lobby sang BCGC, samtang ang 40 ka voice workers ipahamtang sa second floor. Ang operasyon sang temporary co-working space maga-sugod las-7 sang gab-i tubtob las-6:30 sang aga, lakip na ang weekends.
Ginpahayag man ni Atty Mayo nga may pre-registration nga ipatuman agud masiguro nga masarangan sang internet connection ang kadamuon sang mga online workers, kag may guidelines man nga igapatuman online.
Padayon man ang operasyon sang Youth Lounge sa Ayala Malls Capitol Central, halin las-10 sang aga tubtob las-6 sang gab-i.*