150,000 pesos ang padya para sa Miss Bacolod MassKara, 65 ka mga corporate awards itanyag sa mga kandidata
Halin sa 90 ka aspirants, magasugod na subong nga Biyernes ang kompetisyon sang 15 ka mga opisyal nga kandidata sang Miss Bacolod MassKara 2026.
Bitbit sang tagsa ka kandidata ang identity sang tagsa ka Barangay nga ila gina represent.
Ginsiling ni Terry Conlu, Director sang MBM nga masobra na sa isa ka bulan nga gin-train ang mga kandidata agud mahatagan sang manami nga kompetisyon ang mga Bacolodnon.
150,000 pesos ang padya para sa makakuha sang korona sini nga tuig samtang 100,000 pesos naman sa 1st runner-up kag 50,000 pesos sa second runner-up.
Magluwas sini may 65 man ka corporate awards nga itanyag sa 15 ka mga kandidata. Dugang ni Conlu, may tig-80,000 pesos nga subsidy gikan sa foundation ang mga kandidata.
Sa Biyernes pagahiwaton ang talent kag press presentation sa Ayala Malls Capitol Central kag sa Oktubre 4 naman ang Festival Costume Competition.
Magatakop ang kompetisyon sa Oktubre 11 sa STI West Negros University Gymnasium kun sa diin hiwaton ang grand coronation night.
Isa sa mga bag-o sa presentation sang coronation night suno kay Conlu amo ang evening gown competition kun sa diin ipasundayag sang 15 ka mga kandidata ang ila gown nga nagapakita sang Centennial year features sang Bacolod City Public Plaza.
May mga artista man kag national beauty queens nga maabot, apang wala pa ini ginhingadlan.
2 million pesos ang pondo sang Bacolod Gugma Foundation nga gingamit para sa Miss Bacolod MassKara 2026.
[sibwp_form id=1]