Padayon ang pag pangusisa sa nagluntad nga fish kill sa banwa sang Ilog.
Suno kay Gideon Padilla ang pamuno sang Municipal Disaster Risk Reduction Office sang Ilog, mga duha ka semana na ang nagligad sang may gin-report nga nakit-an nga mga nagkalamatay nga mga isda sa suba sang Ilog.
Indi man makabig suno sa iya nga massive ang fish kill. Pero suno kay Punong Barangay Nicanor Lopez sang Brgy 2, 500 ka kilo sang isda ang napatay sang June 9, 150 ka kilo naman sang July 1.
May ginpatigayon nga sampling ang Brgy 2 sang Ilog kag gin analyze sang Negros Prawn Producers Cooperative nga laboratory.
Ugaling suno kay Lucia Salazar ang supervising Specialist sang DENR cenro, in question ang resulta sang amo nga analysis bangud ang sample nga ginkuha sang June 10 kag June 14 na na endorse sa laborotary.
Kuntani sa sulod sang anum ka oras humalin sang ginkuha ang sample dapat napa analyze ini. Posible suno kay Salazar na contaminate na ang sample.
Gina duso karon ang liwat nga pagpatigayon sang sampling suno kay Salazar nga pamunuan sang BFAR, upod ang ila talatapan kag iban pa gid nga ahensya agudto mapat-od ang gintunaan sang fish kill.