Humalin sang nagligad nga semana ginsuguran na sang tag-iya sang duta ang paghakot sang mga gintambak nga basura sa iya propiedad sa kilid sang Sum-ag River sa Bacolod.
Ini makaligad sang gin-issue nga Cease and Desist Order sa ginahimo nga backfill operation sa kilid sang suba gamit ang basura. Ginpahayag ni BENRO head Ma. Fe Trespuentes nga masobra na sa 20 ka truck ang napahakot nga basura sang property owner pakadto sa sanitary landfill sa Barangay Felisa.
Mismo ang contractor nga naghaul sang basura pakadto sa Sum-ag ang nanghakot sang gintambak nga basura.
Magluwas sa Barangay Sum-ag nag-issue man sang Cease and Desist Order ang City Legal Office batuk sa isa pa ka tag-iya sang duta sa Barangay Punta Taytay nga nagpatambak man sang iya propiedad gamit ang basura halin sa daan nga dumpsite sa Barangay Mandalagan.
Ginapaabot sang BENRO nga masuguran man sang tag-iya ang pagkakas sang basura sa amo nga lugar.