Shadow

Ginsuguran na sang DPWH ang pagkaayo sang buho sa Circumferential Road

Portion sang naguba nga karsada nga malapit sa intersection sang Burgos kag Circumferential Road ang ginsuguran na kaayo sang Department of Public Works and Highways.

Sang nagligad lang nga adlaw nakibot ang pila ka mga motorista sang matalupangdan ang dako nga buho gikan sa naguba nga sementado nga dalan malapit sa corner sang Burgos kag Circumferential Road.

Pila ka mga netizens ang natingala kun ngaa masami may diperensya sa amo nga alagyan bisan pa makapila naman ka beses nga may ginapatuman nga road repair kag construction sa amo nga dalan.

Kaina ginkadtuan na gilayon sang katapo sang department of public works and highways ang lugar kag ginsuguran ang pagkaayo sang dalan.

Suno kay District Engineer Jaime Javellana, mahimo nag leak ang water pipeline malapit sa nagtuhaw nga buho kabangdanan nga nag-usmod ang duta. Posible man nga bangud sang dalagko nga mga trak nga naga-alagi, nagbungkag ang sementado nga dalan.

Ginapaabot na lamang karon sang DPWH Bacolod nga matigayon ang ginadihon nga road project agud nga matagaan sang pat-ud nga solusyon ang pagkaayo sang karsada kasubong sang pagkaayo nila sa dalan sa atubang sang Bacolod City Government Center.

Leave a Reply

Your email address will not be published. Required fields are marked *

Secured By miniOrangeSecured By miniOrange