Gina pakamalaut sang gin dismiss nga empleyado sang Office of the Provincial Agriculturist ang pagkakas sa iya sa serbisyo.
Sa ginpadala nga pahayag sa katapo sang media, naga panindugan si Herminigildo Basilio ang agriculturist 1, nga gin-dismiss angut sa missing nga 789 ka sako sang abono, nga wala sang evidentiary support ukon nagakaigo nga nangin basehan ang desisyon batuk sa iya.
Iya ginsiling nga napaathag niya ang iya nga bahin.
Naghatag man siya suno sa iya sang mga ngalan nga ilakip sa pagpangusisa para man matukiban ang kamaturan.
Dugang pa niya nag hatag man siya sang pagpamatuod nga indi na siya ang in-charge sa Rice Processing Center sa Brgy. Tabunan sa Bago City sa masobra na isa ka tuig sang tion nga ang 789 ka sako sang abono ang gina alegar nadula. Wala man siya sang yabe sang bodega.
Ginsunod lamang niya ang instruction sang iya division chief nga si Alnel “Potchie” Taba sa pag facilitate sang pag baton sang 1,920 ka bag sang fertilizer gikan sa Juantong Agri-Ventures mga las 3 sang hapon sang July 4, 2022. Kumpleto ini nga na unload sa bodega kag gin acknowledge man sang watchman kag guard on duty.
Damlag pa, ginsiling ni Provincial Legal Officer, Alberto Nellas, Jr., nga ang pagbaton sang amo nga delivery nanday Basilio kag kaupod sini nga si Joy Cardinal nga Agriculturist 1 man, ang wala sang coordination gikan sa gobyerno probinsyal.
Indi man mapatihan suno sa desisyon ang gina claim ni Basilio nga indi na sya ang in-charge sa safekeeping.
Nag-resign naman damlag pa si Taba.
Ang pag-dismiss sa iya matapos ang masobra isa ka dekada nga pag serbisyo tuman kasakit sa iya kag sa iya pamilya.
Suno kay Basilio nagapakita ini sang inhustisya sa kapitolyo. Iga appeal ni Basilio ang iya dismissal sa isa ka impartial authority suno sa iya.