Ginatus ka mga informal settlers nga sarang maapektuhan sang ginadihon nga coastal road project sa Bacolod tagaan prayoridad sa onsite housing kag relocation program.
Nalakip sa igadihon nga feasibility study para sa ginaplano nga Bacolod Coastal Tourism Road Project ang paghatag atensyon sa ginatus nga mga informal settler families nga sarang maapektuhan sang proyekto.
Dugang pa diri ang pagpatigayon sang environment assessment and review sa mangin epekto sang 17 kilometer coastal road nga maga-angut sang Barangay Banago sa Barangay Punta taytay.
Suno kay City Administrator Atty. Pacifico Maghari, III, prayoridad sang local government unit nga ma-relocate ang mga apektado nga residente sa igatanyag nga onsite housing project.
May P30B ang pondo nga ginakinahanglan para sa coastal road construction nga sarang maglawig sa pito ka tuig kun ini ang masuguran sa 2025.
Kapin sa P11.6B naman ang pondo nga ginaduso para sa Asenso Yuhum Housing Project nga kabahin man sa anum ka mga major infrastructure projects nga ginalauman sang siudad nga maponduhan pinaagi sa Public Private Partnership kag sa posible nga mga grants.