Tigayon na nga naaresto sang kapulisan ang gina alegar notorious nga rapist nga nagapanaka saka sa mga pamalay sa siyudad sang Sagay.
Naaresto kahapon ang 18 anyos nga suspek nga si George Martinez matapos sini liwat nga gin sulod ang isa ka balay sa Barangay Rizal sa Sagay City nga iya na gin sulod.
Suno kay Lt Col Jonel Guadalupe, hepe sang Sagay PNP, tuyo kun tani nga tandugon sang suspek ang babayi apang siya ang gin tiklod kag ginlock sa kwarto.
Gilayon man naka responde ang kapulisan kag naaresto si Martinez. Positibo man siya nga ginkilala sang menor de edad nga iya tuyo nga tandugon man sang nagligad nga Martes.
Magluwas sa duha, may isa pa ka tagreklamo nga nag tudlo man kay Martinez nga amo ang nag sulod sa ila nga balay.
Naga panawagan man si Guadalupe nga kun may iban pa nga nabiktima si Martinez, mahimo sila mag padulong sa Sagay PNP agud mapasaka ang reklamo batuk sa suspek.
Kaso nga attempted rape ang ipasaka sang PNP batuk kay Martinez.