Arestado kahapon sa buybust operation sa Brgy. Hilamonan, syudad sang Kabankalan ang gina alegar leader sang Bugalon Drug Group nga si Jonalyn Bugalon.
Naaresto man ang iya upod nga si Juanito Artisano Jr. Narecover sa mga suspek ang isa ka plastic kag 13 ka sachet sang suspected shabu nga ginabulubanta nagabalor sa 884,000 pesos.
Detained sila karon kag kaso nga paglapas sa RA9165 ang ginpasaka na batuk sa ila.
Samtang, 1.4 milyones pesos naman liwat nga balor sang iligal nga droga ang na recover sa buybust operation kagab-i sang City Drug Enforcement Unit sa Purok Kahirup Barangay Singcang Airport.
Dakop sa buybust sang 21 anyos nga si Jeboy Poneles nga isa ka high value individual nga nakuhaan sang 206 ka gramos sang suspected shabu. Detained na ini karon.
Sang dominggo lang na recover man sa Baragnay Pahanocoy ang 4.3 milyones nga balor sang iligal nga droga. Suno sa CDEU, subong pa lang naga stock sang supply ang mga naga duso sang iligal nga droga bangud sang natalana man nga pag hugot sang seguridad sa nagahilapit nga Masskara Festival.